 |
 |
 |
 |
 |
O Concello
| Saúdo do alcalde |
| Corporación |
| Acerca do concello |
| Ordenanzas e regulamentos |
| Patrimonio |
| Actas dos plenos |
| Localización |
Servicios Xerais
| Departamentos |
| Ofertas de emprego |
| Perfil do contratante |
| Descarga de modelos |
| Novas do concello |
| Anuncios públicos |
| Caixa de suxestións |
O tempo
Outros recursos
Proxectos
|
||
Novas xerais
A Concellaría de Servizos Sociais, Muller e Igualdade, dirixida por Teresa París, organiza o MUSICAL MAGO DE OZ.
O Musical está preparado e escenificado polos membros dos Grupos de dinamización teatral das parroquias de Chapela e Ventosela, actrices, actores e persoal de apoio non profesional pero cunha gran paixón polo teatro.
Os Grupos de dinamización teatral, nos que participan mulleres e homes de diferentes idades, están dirixidos por Chusa Couñago, e foron organizados dende o Departamento de Muller e Igualdade nas parroquias de Cedeira, Chapela, Reboreda, Saxamonde e Ventosela. Traballan todo o ano nos centros culturais das parroquias, descansando no mes de agosto, e ademais da propia práctica e divulgación da cultura teatral, tamén son unha ferramenta idónea para a creación dunha rede social de apoio, fomentar a expresión emocional, corporal e artística e ofrecer a posibilidade de pertencer a un grupo no que todos os seus membros teñen algo importante e único que achegar.
O Musical conta a historia de Dorita, unha nena que vive no campo coa súa tía e o seu tío, que por mor dunha tormenta chega ao mundo máxico de Oz, onde topará ademais duns compañeiros de viaxes, personaxes estraños e perigos. Deberá atopar ao Mago de Oz para poder volver coa súa familia.
A obra presentarase no Multiusos de Chapela o vindeiro domingo 26 de maio, ás 19.00 horas, con entrada de balde ata completar aforamento.
Para máis información podédesvos dirixir ao CIM (Centro de Información ás Mulleres), na rúa Isidoro Queimaliños, núm. 2, ou chamando ao 986 40 80 43.
Tamén estamos nas oficinas de Servizos Sociais e Igualdade de Chapela, na avenida de Redondela (baixos do pavillón de deportes), ou chamando ao 986 45 89 93.
Redondela, 21 de maio de 2013
As actividades programadas para celebrar as LETRAS GALEGAS 2013 continúan este luns, 20 de maio, ás 20.30 h, na Casa da Cultura de Redondela, onde o autor e crítico teatral, profesor e director da Mostra Internacional de Teatro de Ribadavia, Roberto Pascual, vai ilustrarnos sobre Roberto Vidal Bolaño e ás diferentes profesións teatrais que tanto contribuíu a dignificar e modernizar.
Para iso vai explicar e profundar sobre as cuestións desenvolvidas no seu libro «Roberto Vidal Bolaño e os oficios do teatro«, publicado por Edicións Xerais.
Roberto Vidal Bolaño non só foi escritor e autor teatral, senón que utilizou todos os recursos posibles e inventou outros para facernos entender o teatro, para modernizalo e dignificalo, coa súa poderosa voz, «con máscaras, coa forza expresiva do corpo, dos ritmos populares, de técnicas audiovisuais…».
«Esta obra amosa o que hai detrás dos fíos que crean a maxia inesgotable, eternamente transformadora, da arte do teatro», e Roberto Pascual vainos axudar a descubrilo.
Aprobado por Resolución da Alcaldía do 12 de febreiro de 2013 o PREGO DE CLÁUSULAS ADMINISTRATIVAS PARTICULARES QUE REXERÁN A LICITACIÓN PARA O OUTORGAMENTO DE AUTORIZACIÓNS PARA INSTALACIÓNS E OCUPACIÓNS TEMPORAIS NAS PRAIAS DO CONCELLO DE REDONDELA EN 2013.
O Servizo de Normalización Lingüística, dependente da Concellaría de Cultura, comeza coa celebración do mes das Letras Galegas 2013.
A primeira actividade consistirá nun relatorio do escritor, profesor e presidente da Fundación Rosalía de Castro, Anxo Angueira, que nos achegará á figura e á obra de Rosalía de Castro cando se cumpren 150 anos da publicación dos seus “Cantares Gallegos”, saído do prelo o 17 de maio de 1863.
Este foi o primeiro libro escrito integramente en lingua galega e a súa importancia histórica é fundamental para comprendermos a literatura contemporánea e o rexurdir da nosa lingua propia, feito que foi salientado pola Real Academia Galega ao escoller esta data para instaurar o Día das Letras Galegas.
Anxo Angueira, que vén de publicar, precisamente estes días, unha edición crítica de “Cantares Gallegos”, ilustraranos sobre a repercusión e a vixencia da obra rosaliana nas nosas letras e na cultura galega contemporánea.
A conferencia celebrarase o mércores, 8 de maio, ás 20.30 h, na Casa da Cultura de Redondela.
A entrada é libre.
O Servizo de Normalización Lingüística e a Concellaría de Cultura, dirixida por Julio Alonso Monteagudo, desenvolven dende hoxe o programa de ROTEIROS GUIADOS EN MONTE PENIDE. O proxecto está desenvolvido por A CITANIA, Xestión do Patrimonio, e conta coa colaboración de distintos centros educativos redondeláns a través da Coordinadora ENDL de Redondela.
O proxecto pretende dar a coñecer, entre a poboación máis nova, o patrimonio arqueolóxico, paisaxístico e cultural redondelán, a través da sensibilización e a dinamización social. O obxectivo primordial é dar a coñecer o patrimonio do concello para promover o interese pola súa conservación e preservación, e para este fin cóntase coa súa difusión entre o alumnado redondelán a través dos centros de ensino primario e secundario.
A finalidade deste proxecto é a conservación dos diferentes elementos que conforman a arqueoloxía do noso concello a través da educación, dunha implantación no ensino que valore e presente o noso patrimonio entre o público máis cativo como un ben común que cómpre divulgar e protexer. A estratexia difusora baséase en dar a coñecer un patrimonio que aínda segue oculto para o público xeral, porque non se pode apreciar e valorar aquilo que se descoñece.
Dada a complexidade e abundancia dos restos espallados por todo o Concello de Redondela, esta experiencia centrarase nos elementos que se atopan no contorno do espazo coñecido como Monte Penide ou Monte Mirallo, onde están localizadas as culturas máis representativas da prehistoria galega: o Neolítico, coa necrópole megalítica de “Chan da Cruz/Chan das Formigas”; o Calcolítico/Idade do Bronce, cos Petróglifos de Monte Penide ou Monte Mirallo; e a Idade do Ferro, co Castro de Negros.
O roteiros comezaron hoxe con dous grupos do IES Illa de San Simón, e continuarán durante todo o mes de maio con alumnado do IES Chapela, CEP Santa Mariña, CEIP Cedeira, CEIP Porto Cabeiro, IES Mendiño, CEIP Laredo e CEIP Santo Paio de Abaixo, e participarán dos mesmos arredor de 540 rapaces e rapazas.
Redondela, 2 de maio de 2013
Anuncio da exposición pública da matrícula do Imposto sobre Actividades Económicas, correspondente ao exercicio 2013:A N U N C I O
EXPOSICIÓN PÚBLICA DA MATRÍCULA DO IMPOSTO SOBRE ACTIVIDADES ECONÓMICAS CORRESPONDENTE AO EXERCICIO DO 2013
De conformidade cos artigos 90 e 91 do Real Decreto Lexislativo 2/2004, do 5 de marzo, polo que se aproba o texto refundido da Lei Reguladora das Facendas Locais, e mais co art. 3 do Real Decreto 243/1995, do 17 de febreiro, a matrícula do imposto sobre Actividades Económicas do exercicio 2013 porase ao dispor do público na oficina de Xestión Tributaria do Concello de Redondela, durante o prazo de 15 días contados a partir da exposición deste anuncio no Boletín Oficial da Provincia. Contra os actos de inclusión dun suxeito na matrícula, así como a súa exclusión ou alteración de calquera dos datos que deben constar na mesma, os interesados poderán interpor, consonte se dispón no art. 4 do citado Real Decreto, no prazo de un mes a contar desde o seguinte ao do remate do período de exposición pública, recurso de reposición perante a Axencia Estatal de Administración Tributaria competente ou reclamación económico-administrativa ante o Tribunal Económico-Administrativo Rexional de Galicia.
Redondela, 29 abril 2013
O Alcalde
Asdo.: Javier Bas Corugeira
A proposta da Asociación Cultural Alejandro Otero foi finalmente a elixida pola Comisión de Cultura e deberá ser ratificada este luns na sesión plenaria que se celebra ás 20:00 horas. Na elección deste persoeiro tívose moi en conta o feito de que neste ano se conmemore o 125 aniversario do seu nacemento
Ernestina Otero ou Rita Regojo foron, xunto con de Alejandro Otero, os tres persoeiros que diferentes colectivos culturais e sociais propuxeron para ser homenaxeados durante este ano.
PARA ESCOITAR E LER MÁIS SOBRE ESTA NOVA, PREMA AQUÍ
(FONTE: Radio Redondela - Autora: Mª Xesús Queimaliños)
O festival de teatro que se viña celebrando nos meses de febreiro e marzo foi posposto condicionado, segundo explicacións do Concelleiro de Cultura Julio Alonso, polo parón vivido no Agadic (Axencia Galega das Industrias Culturais) nestes primeiros meses do ano, parón que impedía chegar a acordos que permitisen a contratación de compañías a través deste organismo.
PARA ESCOITAR E LER MÁIS SOBRE ESTA NOVA, PREMA AQUÍ
(FONTE: Radio Redondela - Autora: Mª Xesús Queimaliños)
A curtametraxe de Esteban Crespo, traballo que recibiu este ano o Goya na categoría de mellor curtametraxe de ficción, partía como clara favorita na IX edición do Festival Redondela en curto que dende o pasado xoves e ata onte domingo se celebrou no Multiusos da Xunqueira.
PARA ESCOITAR E LER MÁIS SOBRE ESTA NOVA, PREMA AQUÍ
(FONTE: Radio Redondela - Autora: Mª Xesús Queimaliños)
Xa pode descargar as bases destas axudas nesta web, pinchando na seguinte ligazón:
Aprobado por Resolución da Alcaldía do dia 12 de abril de 2013 o Padrón do Imposto sobre Vehiculos Traccion Mecánica, correspondente ao exercicio do 2013, estará a disposición do público no servicio de Xestión Tributaria deste Concello, durante o prazo de 15 días contados a partir do seguinte ao da publicación deste anuncio no Boletín Oficial da Provincia, poidendo os interesados/as examinalo e presentar recurso de reposición ante o Sr. Alcalde, no prazo dun mes a contar desde a finalización do período de exposición pública do Padrón.
Padrón do Imposto sobre Vehiculos Traccion Mecánica, correspondente ao exercicio do 2013
O Concello de Redondela puxo en marcha un novo servizo que permite á cidadanía, a través dunha novidosa aplicación para dispositivos móbiles, comunicar as incidencias no equipamento urbano que detecten no municipio e resolver gratuitamente todas as súas dúbidas ambientais da man de expertos neste ámbito.
A presentación do novo servizo será o venres, 15 de febreiro, ás 12.00 h, no salón de plenos da Casa do Concello, e súmase ao que xa ofrecía Liña Verde Redondela, cun servizo de consultas en liña e unha ampla información sobre o medio e o concello no portal www.lineaverderedondela.com
A nova aplicación Liña Verde permite que os cidadáns comuniquen incidencias no equipamento urbano dun xeito moi sinxelo. Para iso, unha vez aberta a aplicación no seu dispositivo móbil, tan só ten que seleccionar unha categoría, detallar a incidencia e, se o desexa, achegar unha foto da mesma.
O propio dispositivo detectará por xeo-localización as coordenadas exactas nas que se sitúa a incidencia, aínda que a persoa usuaria tamén poderá facelo manualmente se decide enviar o aviso noutro momento dende outro lugar. Deste modo, calquera persoa poderá comunicar, de xeito moi sinxelo, deficiencias na iluminación, a limpeza, o mobiliario urbano ou a rede de sumidoiros, entre outras moitas categorías, que detecten no seu concello.
Os técnicos municipais ou da empresa de servizo correspondente recibirán de forma inmediata o aviso, e poderán actualizar directamente o estado da incidencia. Cando a incidencia estea resolta, a persoa que fixo a denuncia recibirá unha notificación no seu móbil.
A través da mesma aplicación ou da web as empresas do municipio tamén poderán resolver gratuitamente todas as súas dúbidas de xeito sinxelo, nun prazo máximo de 24 horas. Expertos en medio ambiente resolverán as preguntas formuladas polas empresas redondelás relacionadas coa lexislación ambiental, os sistemas de xestión ambiental, a xestión de residuos ou provedores de servizos e tecnoloxías. Ademais, a Liña Verde atende as consultas dos cidadáns acerca da reciclaxe, o aforro enerxético, a contaminación acústica, zonas verdes ou calquera outro tema relacionado co medio ambiente, e permite tamén realizar consultas sobre trámites administrativos, axudas e subvencións, enerxías renovables, tecnoloxías limpas, cursos, etc...
As persoas usuarias tan só terán que entrar na web, rexistrarse e realizar a súa consulta en liña, e poderán obter resposta a preguntas tan sinxelas como:
-
É mellor apagar os fluorescentes ou deixalos acendidos se se vai volver deseguido?
-
Que subvencións existen para un proxecto dunha instalación de tratamento de augas industriais?
-
Que consellos podo seguir para o aforro enerxético nas lavadoras?
-
Existe un Punto Limpo no municipio?
-
Que se fai coa roupa que se recicla?
Ademais do servizo de consultas e de comunicación de incidencias, Liña Verde ofrece á cidadanía de Redondela unha completa información sobre temas relacionados co medio natural. Alí as persoas usuarias poderán encontrar noticias, documentos, manuais, ordenanzas, lexislación nacional e autonómica, axudas e subvencións, axenda de eventos destacados, un completo glosario con termos ambientais e preguntas frecuentes, entre outras posibilidades.
Redondela, 13 de febreiro de 2013
Destacados
Departamentos
 |
 |
|
 |
 |
|
 |
 |
|
 |
 |
|
Servizos
